திருவண் புருஷோத்தம பெருமாள்
திருவண் புருஷோத்தமம் ( திருநாங்கூர் ) '
திருநாங்கூர் ‘ – என்பது சின்ன ஊராக இருந்தாலும் பகவானின் கடைக்கண் பார்வை மிக அதிகமாகப் பெற்ற ஊர் என்பதால் பெருமாள் கடாட்சம் பொருந்திய ஊர் என்பதில் எந்தவித சந்தேகமும் இல்லை. இந்த சின்னஞ்சிறிய ஊரில் ஒரே தெருவில் திருமணி மாடக் கோவில் , திரு அரிமேய விண்ணகரம் , திருத் தெற்றியம்பலம் , திருவண் புருஷோத்தமம் என்ற நான்கு கோயில்களும் அமைந்திருக்கின்றன. இவையனைத்தும் பெருமாளின் பெருமையையே பறைசாற்றுவதால் 108 திவ்ய தேசங்களுக்குள் தனி இடம் பெற்று சிறப்பாக மிளிர்கின்றன.
திருநாங்கூர் சீர்காழியிலிருந்து எட்டுகிலோ மீட்டர் தூரத்தில் இருக்கிறது . சிறிய கோவில் ஒரு பிராகாரம் சுற்று.
மூலவர் புருஷோத்தமன். கிழக்கு நோக்கி நின்ற திருக்கோலம்.
தாயார் புருஷோத்தம நாயகி
தீர்த்தம்திருப்பாற்கடல் என்ற பெரிய திருக்குளம்.
விமானம் சஞ்சீவி. விக்ரகம்
தலவிருட்சம் வேம்பு.
💚திருமாலுக்கு புருஷோத்தமன் என்ற திருப்பெயர் ஏற்பட்ட முதல் ஸ்தலம் என்று சொல்லப்படுகிறது.
💚தை அமாவாசைக்கு மறுநாள் இங்கு நடக்கும் கருடசேவை உலகளாவியப் புகழ்பெற்றது.
💚திருமங்கையாழ்வார் மட்டுமல்ல ஸ்ரீ மணவாள மாமுனிகளும் மங்களாசாசனம் செய்த ஸ்தலம் என்ற பெருமையும் உண்டு.
இந்தக் கோயிலைப் பற்றி பராசவனப் புராணத்தில் மிகவும் விரிவாகக் கூறப்பட்டுள்ளது மிகப்பெரிய முனிவர் வியாக்கிரபாதர். இவர் , வெகுநாள் குழந்தையில்லாமல் இருந்தார் புருஷோத்தமனான திருமாலை தினமும் வேண்டிக் கொண்டிருந்தார். பெருமாளின் அருளால் இவருக்கு ‘ உபமன்யூ ‘ என்ற ஆண் குழந்தை பிறந்தது. தன் பெயரைச் சொல்லக்கூடிய அளவுக்கு வாரிசு பிறந்த சந்தோஷத்தால் பெருமாளின் திருவடியையே நினைத்து மனமுருக தியானம் செய்து கொண்டிருந்தார்.
ஒருநாள் வியாக்கியபாதர் பெருமாளை நினைத்து தவம் செய்து கொண்டிருந்தார் . அவரது துணைவி வேறு வேலையாக வெளியே சென்றபோது வீட்டில் தனியாக இருந்த ‘ உபமன்யூ ‘ பசி தாங்காமல் அழுதான். குழந்தையின் அழுகுரலைக் கேட்ட புருஷோத்தமன் நாயகியான இறைவி ‘ உபமன்யூ’வின் பசியைப் போக்க பாலமுது ஊட்டினாள். இந்த வியத்தகு சம்பவத்தை அறிந்த வியாக்கியபாதர் அடைந்த மகிழ்ச்சிக்கு அளவே இல்லை.
இன்னொரு சம்பவமும் உண்டு ‘ குமேதஸ் ‘ என்பவன் படிப்பறிவு எதுவும் இல்லாதவன். இதனால் ஊரார் அவனை கேலி செய்து மனம் நோக அடித்தனர் . இதனால் அவமானப் பட்ட ‘ குமேதஸ் ‘ இங்குள்ள பெருமாளிடம் வந்து கதறி அழுதான்.பக்தனின் கண்ணீரைப் போக்க பகவான் புருஷோத்தமன் முன்வந்தார் . பண்டிதனாக மாறினான். பெருமாளின் தெய்வக் கடாக்ஷத்தினால் ‘ குமேதஸ் ‘ பின்னால் மிகச்சிறந்த பண்டிதனாக வலம் வந்தான்.
பரிகாரம் :
வறுமையினால் துடிப்பவர்களும் , கல்வி அறிவு இல்லாமல் கலங்கிக் கொண்டிருப்பவர்களும் குழந்தைகள் எதிர்கால வளர்ச்சி மிகச்சிறப்பாக அமைய வேண்டும் என்று நினைப்பவர்களும் இளம் வயதில் பெற்றோரை இழந்து , தகுந்த பாசமும் அரவணைப்புமில்லாமல் ஒவ்வொரு நாளும் தவிப்பவர்களுக்கும் திருநாங்கூர் புருஷோத்தமன் அடைக்கலம் தருவார். வாழ்வை மேம்படுத்திக் காட்டுவார். இந்தக் கோயிலுக்கு வந்து மனதார பிரார்த்தனை செய்பவர்களுக்கு எந்தக் குறையும் எதிர்காலத்தில் ஏற்படாது. ஏற்கனவே இருந்த குறையும் உடனடியாக விலகிவிடும்.
