ஆங்கில புத்தாண்டு பலன்கள்-2023:மேஷம்
செவ்வாய் பகவானின் அருள் பெற்ற மேஷ ராசி அன்பர்களே!!!
இந்த ஆண்டு உங்களுக்கு மாற்றமும் ஏற்றமும் தரக்கூடிய ஆண்டாக இருக்கும். வேலை பார்க்கும் இடத்தில் உங்களது திறமைகள் பாராட்டப்படும்.அதனால் மேலிடத்தின் ஆதரவும் ஆதாயமும் கிடைக்கும். பல நாட்களாக முடங்கிக் கிடந்த உங்களது திறமைகள் பளிச்சிட ஆரம்பிக்கும். பலகாலமாக இடமாற்றத்திற்கு முயற்சித்து முடியாமல் இருந்தவர்கள் தற்சமயம் அதிக ஊதியத்துடன் இடமாற்றம் ஏற்படும்.
உங்களது பணிகளில் மூன்றாவது நபர் தலையீட்டை முடிந்த அளவு தவிர்த்து விடுங்கள். குடும்பத்தைப் பொறுத்தவரை சிறப்பான கால கட்டமாக இந்த ஆண்டு இருக்கும். கணவன் மனைவியிடையே இருந்த பிரச்சனைகள் யாவும் அகன்று நிம்மதி பிறக்கும். அதேசமயம் உங்கள் ராசிக்கு 2ல் செவ்வாய் இருக்கும்போது புத்தாண்டு பிறப்பதால் உங்களது வார்த்தைகளை கவனமாக பயன்படுத்த வேண்டும்.
மேஷ ராசியினருக்கு இதுவரை இருந்து வந்த கல்வித்தடை, திருமணத் தடை ஆகியவையாவும் அகலும். செய்யும் தொழிலில் முழுமையான உழைப்பு இருந்தால் சீரான வளர்ச்சியும் ஆதாயமும் கிட்டும். அரசு,அரசியல் சார்ந்தவர்களுக்கு ஆதரவு அதிகரிக்கும். எதிர்பாராத பதவி, கௌரவம், பாராட்டு மனதுக்கு மகிழ்ச்சி தரும்.
பொது இடங்களில் பேசும்போது வார்த்தைகளில் நிதானமாக இருக்க வேண்டும். வீண் ரோஷங்களை தவிருங்கள். மாணவர்கள் மனம் போல மதிப்பெண் கிடைக்கும். அயல்நாட்டு செல்லக்கூடியவர்கள் அந்தந்த நாட்டு சட்ட திட்டங்களை முழுமையாக கடைபிடியுங்கள்.
கலைத்துறையினருக்கு வாய்ப்புகள் படிப்படியாக வளரத் தொடங்கும். மனதை ஒருநிலைப்படுத்தும் தியானம், யோகா பழகுங்கள். தினமும் சிறிது நேரமாவது உடற்பயிற்சி செய்யுங்கள். ஒற்றைத் தலைவலி, சைனஸ் நரம்பு உபாதைகளை உடனே கவனியுங்கள்.
பரிகாரம்:
கும்பகோணத்திற்கு அருகிலுள்ள சுவாமிமலை முருகப்பெருமானை செவ்வாய் கிழமை செவ்வாய் ஓரையில் சென்று தரிசித்து வாருங்கள் கஷ்டங்கள் யாவும் விலகி வாழ்க்கையில் நிம்மதி பெருகும்.
